الآن تقرأ
مدربة الكيك بوكس داليا العمري: المجتمع المصري مابيفهمش الست القوية

تصوير: نهي حمدي – رقية نشأت

في الـ 31 من عمرها، إلا أنها تبدو أصغر من ذلك، درست علم النفس، وكانت وقت الدراسة مداومة على الذهاب لـ “الجيم” مع صديقاتها، خاصة أنها تحب الحركة بشكل عام، وكانت كليتها تساعدها علي ذلك لكونها كلية عملية، تري أنها من خلال رياضتها المفضلة تستطيع تغيير حياة الآخرين وذلك ما يمكنكم معرفة تفاصيل عنه أكثر من خلال حوارنا التالي مع داليا العمري.

إمتى قررتي تلعبي رياضة في العموم؟

أنا بلعب جيم من وأنا في الجامعة بس على خفيف كده، وكانت حركتي كتير أوي في الجامعة، لأن الكلية كانت عملية وكان دايما عندنا أبحاث بنعملها، وبالتالي بتحرك كتير، وبعد الجامعة بدأت أروح مع أصحابي النادي، الجيم، لأني بحب الحاجات اللي فيها دفاع عن النفس، لأن كمان المجتمع المصري بيحب التحرش، يعني مثلا لما أروح مشوار في المترو وألاقي بنت غلبانة جدا وجنبها ولد ومضايقها وهي ساكتة فبيبقي نفسي اقولها “اضربي أمه”، فبدأت أتضايق، وبعد فترة اشتغلت في مرسيدس، وبقيت آجي الجيم هنا كعضوة عادية من يجي 5 أو 6 سنين، كان وزني حوالي 85 كيلو، وكنت جايه أخس، وأحضر  ورش لغاية ما لاقيت بقي كورسات “بوكسينج”.

Captured by Noha Hamdy (4)

إيه اللي شدك لـ “الكيك بوكسينج بالذات”؟

أولا بطلع كل الطاقة السلبية اللي جوايا فيه، زيي زي أي بنت، بتخيل أي حد متغاظة منه، في الأول أخدته بشكل مبدئي لكن بعد شوية بقيت عايزة أعرف عنه أكتر، لأني بعد ما بلعب بحس بهرمون ز يهرون السعادة، ثانيا بيرسم الجسم جدا، وبيقسم بشكل حلو جدا، ومش بيربي عضلات، وحتي لو شيلت أوزان مش هيطلع للبنات عضلات.

Captured by Noha Hamdy (7)

بما إنك دارسة علم نفس هل لعب الرياضة زاد خلال 4 سنين اللي فاتوا خاصة بعد التحرش؟

قبل 25 يناير الرياضة كانت قليلة للبنات، وكان بيتقال إزاي البنات تروح جيم وجيم مختلط والشباب يفضلوا يبصوا عليها، مع إن الناس رايحة الشغل عشان تلعب مش عشان يتعرفوا علي بعض، لكن بعد 25 يناير الدنيا اتفتحت شوية، والبنت بدأت تنزل وتروح وتيجي، والبنت كانت بتخاف تشيل حديد دلوقتي لأ عادي، وده لأنهم مكبوتين، لكن هي دلوقتي زيها زي الولد.

وأواقات في بنات بتيجي لأنها ضعيفة شوية، فالدكتور بيبعتهالي عشان تبقي أقوي شوية، وفي “الكيك بوكسينج”، في بنات بقي كتير بيجوا، وبيلعبوا بغل جدا فتطلع كل حاجه مكبوتة جواها، وفي منهم بيبقوا محجبات.

Captured by Noha Hamdy (1)

Captured by Noha Hamdy (10)

في المجتمع المصري ما بنفهمش أوي الست القوية؟

الفكر ده دلوقتي أتغير خالص، والرايضة دخلت في مصر كتير جدا، وبقي في ناس الصبح بتقوم تجري في الشارع، ويخلصوا يروحوا الجيم، وبقي بيتعمل أيفينتات بيشارك فيها أطفال وستات ورجالة، ويمكن نقول إنها بقيت الموضة مؤخرا لأن فجأة كل ده ظهر، وبالتالي مبقاش في فكر مقفول، والناس بيسيبوا بناتهم يروحوا الجيم عشان يتعلموا.

Captured by Noha Hamdy (11)

إنتي ناوية تحترفي “الكيك بوكسينج”؟

لأ .. ناوية أعلم ناس فقط، لكن أدخل بطولات لأ مش عايزة.

Captured by Noha Hamdy (9)

Captured by Noha Hamdy (8)

هل بتابعي ستات برة بيلعبوا كيك وكسينج؟

اللاعبة المفضلة بالنسبة لي، ويمكن كمان بعتبرها مثلي الأعلى هي “روندا روسي” Ronda Rousey، هي لاعبة أمريكية الجنسية في الأصل، بطلة العالم في أنواع كتير من فنون القتال زي: الكيك بوكسينج، الجودو، و الـ MMA .

Ronda Rousey

Captured by Noha Hamdy (17)

Captured by Noha Hamdy (16)

في البيت عندك تقبلوا إنك بتلعبي “الكيك وكسينج”؟

لحد وقت قريب لأ وكأنهم بيقولوا “روحي يا بنتي إلعبي بعيد عن هنا”، إنتي بتعملي ده بس لو حصل حاجه في الشارع هتبقي قطة، لكن حصل موقف يمكن يكون بسيط، والدتي كانت راجعة من الشغل قابلتها قدام البيت لما حصلها مشكلة مع حد وعملها حاجه مش كويسه، فبسأل مين بيتخانق قالولي ماما بصيت من البلكونة، ونزلت بقي فبتخانق مع الولد ده وبقوله بتتخانق مع واحدة أد والدتك إزاي، شتمها أول ما شتمها أنا ماحسيتش بنفسي فضربته وهو أتصدم من ده.

Captured by Noha Hamdy (22)

Captured by Noha Hamdy (19)

إنتي مخطوبة.. وفي ناس ممكن تخاف و تتراجع في إرتباطها ببنت بتلعب رياضة خاصة لو لعبة زي “الكيك بوكسينج”؟

أنا شخصيا ما أتعرضتش للموقف ده، بس ليا أصحابي ولاد، قالولي في ولاد فعلا مش بيحبوا البنت الرياضية، وفي العكس، بس أنا خطيبي بيحب البنت الرياضية، وشايف إن كويس إن مراته هتبقي كده، لأن الرياضة بتخلي البنت مخها متفتح، وبتنشر في الجسم هرمون السعادة، ده غير إن لو مفيش رياضة الست هتحاوطها هموم الحياة، لكن الرياضة هتخلي ولادها في صحة أفضل. ولما يبقي الزوج رياضي والزوجة كمان، ممكن بدل ما يتخانقوا يروحوا يجروا شوية.

أما بقي اللي مش عايز اللي مرتبط بها تبقي أقوى منه جسمانيا، إما هو مش واثق في نفسه، لأنه حاسس إنه شخصية ضعيفة، وبالتالي شايف إنها هتبقي أقوى منه، لأن الرياضة بتدي ثقة في النفس جدا، وفي نوع من الرجالة الشرقية بيخافوا إن الست لما تلعب رياضة تبقي أقوى منه.

Captured by Noha Hamdy (2)

Captured by Noha Hamdy (23)

Captured by Noha Hamdy (5)

في هوايات تانية ليكي بره الرياضة؟

بحب أرسم، وأنا عندي أصلا شركة إعلانات، وأخدت كورسات للتصميم، وفتحت مكتب لنفسي كمان، بس الهواية الأساسية هو “الجيم”، لأني بغير حياة الناس من خلاله، خاصة إني أحيانا كانت في ناس بتيجي وأقولها حاجه فألاقي رد الفعل “اللي قولتيه نفعني أوي ويشكروني” فبتبسط إني بغير في حياتهم، فقولت لنفسي ليه ما أشتغلش اللي بحبه.

captured by rokaya nashaat (5)

Captured by Noha Hamdy (6)

عن الكاتب
ناهد سمير
صحفية منذ أكثر من 10 سنوات، عملت في العديد من الصحف الورقية أبرزها (الدستور الأصلي - الدستور اليومي - المصري اليوم) وعدة مواقع مثل (موقع جريدة الوطن - البوابة نيوز- موقع دوت مصر)، إضافة إلي العمل في إعداد برامج الراديو لمدة عام في راديو أرابيسك، وكانت هناك مهن أخري مثل: - مسؤول دعاية وإعلان في مكتبة عمر بوك ستور - مسؤول دعاية وإعلان في دار اكتب و دار صفصافة - تنظيم أحداث ثقافية لمدة عامين (ورش عمل وأنشطة أخري) - إدارة أعمال بعض الكتاب و أحد فرق الأندرجراوند وهي فرقة "عشرة غربي".