الآن تقرأ
 8 نصايح للتعامل مع لعنة شهر “أغسطس”..السنة الجاية

عانيت من طول شهر أغسطس، حصلتلك فيه مشاكل أكتر من أي شهر، مصدق إنه فيه لعنة مرتبطة بيه، هنا نصايح للتعامل مع الشهر اللي بنودعه أخيرا النهارده، محاولة أخيرة لإنقاذ البشرية.

الصبر

الصبر

نصيحة مني  خلي صبرك على تحمل بطء الشهر ده زي صبر واحد صايم في رمضان وبيشر عرق وميت من العطش وقاعد على ترابيزة  عليها ازازة مية فيها تلج  ولسة فاضل على الفطار تلات ساعات  وده بسبب إن الشهر بيعدي ببطء سلحفاه عامية ماشية على طراطيف صوابعها خايفة تدوس على إزاز مكسور .

اقفل الأكاونت

اقفل الاكاونت

لو إنت راجل مصري نصيحة مني  اقفل الأكاونت بتاعك مع بداية الشهر عشان ده شهر فشخ الرجالة على السوشيال ميديا وبيتحفل عليهم من بنات بلدهم وجنسيات أخرى والإسكرين شوت بيبقى للركب والبنات بتبقى متحفزة والجو مكهرب وهما بيبقوا في قمة قوتهم في الشهر ده فطاطي ياباشا لحد الشهر ما يعدي.

اقطع مع صحابك وقرايبك

قطع مع اصحابك

كده كده هتتخانق مع أصحابك وحبايبك وقرايبك كتير في الشهر ده وهيبقوا ماسكينلك ع الواحدة فخليها تيجي منك إنت واتلككلهم على أتفه سبب واقطع معاهم لحد الشهر ما يخلص.

وظائف خالية

وظائف خالية

أول ما تلاقي أغسطس بيقرب خدها من قصيرها يانجم و دور على شغل تاني عشان إنت هتسيب شغلك في الشهر ده أيون هتسيب شغلك  فاعمل حسابك تسيبه وإنت برنس وأول ما يجي واحد أغسطس تدخل على مديرك وتقدم استقالتك على أساس”بيدي لا بيد عمرو” وتقول لمديرك في وشه ” ياعمرو ” حتى لو مش اسمه عمرو وإنت ماشي “دي مهمة جداً وهيفهمها على طول”.

مكان أكل عيشي

مكان اكل عيشي

لو ربنا قسملك يارايق  وكسلت تدور على شغل واللعنة منزلتش عليك ومسيبتش شغلك فلازم تدخل على مديرك “نفس المدير” وتقوله أنا آسف إني فكرت اقولك يا “عمرو” وتطالبه إنه يقتطع جزء من مرتبك من أجل مصلحة المكان لأن المكان أو المؤسسة اللي إنت شغال فيها هتتعرض لخساير فشيخة في شهر 8 وهتبقى معرضة إنها تتقفل خاصة لو مؤسسة “صحفية”.فلازم تقدم السبت عشان لو المكان كمل تبقى كسبت بونط عندهم وبرضو وحيات أمك  هتمشي وهيتخصملك الشهر بإراداتك أو من غير إرادتك وساعتها هتدخل تقوله يا “عمرو يابن العمرو”.

ATM

atm (1)

بص يابن الناس أول ميهل عليك شهر أغسطس تطلع على البنك بتاعك الي شايل فيه قرشين تحت البلاطة وتجدد الكارت عشان الكارت محتاج يبقى جديد نوفي عشان هيتفشخ من كتر ما هيدخل المكنة وإنت بتسحب فلوس عشان تتعامل مع الكوارث المادية في الشهر ده وإنت مش حمل وقفة واحد قصاد مكنة سحبت الكارت بتاعه ومرضيتش تطلعه عشان قديم أو باظ.

التوكيل

الضمان

قبل ما ييجي أغسطس بكام يوم تتصل بكل التوكيلات بتاعت الأجهزه الكهربائية اللي عندك وتحدد معاهم معاد عشان يجوا يصلحوا الأجهزة اللي هتبوظ في الشقة لأن تقريباً مفيش جهاز هيعدي سليم من لعنة أغسطس وتظبط مع سباك كويس يبقى مترقب تحت بيتك طول الوقت عشان كل السباكة بتاعت البيت هتضرب ولو متجوز أو متجوزه وعندك “نيش” حول المنطقة لمنطقة عسكرية ممنوع الاقتراب أو التصوير وأهم تدخل موبايلك التوكيل .

التأمين

التأمين

إنت مش اقل من كيم كارديشيان اللي راحت أمنت على مؤخرتها بـ 21 مليون دولار ممكن تكون أقل منها حجماً في بعض المناطق بس هي مش أحسن منك ـ تطلع على أقرب شركة تأمين وتأمن على كل أعضاء جسمك خلال الشهر ده عشان الاصابات والحروق هتجيلك من اللاشيء وزمن الوقعات العبيطة اللي كنت بتقعها وإنت صغير هيرجع تاني بكل قوة عشان يفكرك بذكريات الماضي الجميل .

عن الكاتب
أحمد يوسف
التعليقات

يجب عليك تسجيل الدخول لإضافة تعليق