الآن تقرأ
11 تعريفا لكتاب غير نجيب محفوظ
من فترة لإن مصر ماشية بمبدأ التريند : كان في شبه احتفالية بالقامة العظيمة نجيب محفوظ، ورغم اعتقادي إن نجيب الكاتب الشمولي الذي لم يترك بابا إلا وطرقه، لكن اللي بيضايقني التعتيم عن المهمشين والمتفردين من الكتاب المصريين اللي بوجود نجيب وهالته الضخمة هما مستخبين في ضله، وعشان في كتاب في مصر يجب قرائتهم بخلاف نجيب محفوظ وكل واحد ليه سلك يعتبر أبعد ما يكون عن نجيب الشمولي :
1 -جمال الغيطاني:
فيلسوف حالم للغاية، مثقف لدرجة كبيرة قارئ بارع للكتب التراثية المنسية، مكثف للغاية الجمل بتاعته قصيرة، نادر جدا عنده الاطالة، مهتم بالحدث، متنوع للغاية، بيكتب في أي اجواء، لدرجة متتخيلش أن كل الحجات دي كاتبها شخص واحد
2- عبد الحكيم قاسم :
من أقوى من كتب بالعربية، اللغة خاصته تقيلة ومتماسكة للغاية، له قاموسه الخاص، مجازي للغاية، عاشق للالفاظ الغرائبية واحيانا المهجورة، الافكار بتاعه على قدر من القوة مجهولة المصدر، عاني من السجن وده بان في كتابته وخاصة كتاباته اللي كتبها في الفترة دي، معظم القصة تدور عن القرية المصرية
3- إدوار الخراط :
 مجنون اسكندرية، المطلع الأعظم، العاشق الاعظم لبلدته، الفانتزي الأول المصري، القصص المبهمة واحيانا الطويلة لدرجة التعقيد، المناهض للبدائية الظاهرة للنص، العاشق للجزء المجهول، الفاظ المندثرة نتيجة لترجماته الكتير، كمان فوق انه كاتب متمكن من ادواته، مترجم شاطر جدا
4- صبري موسى :
 كاتب دمياطي، القصص خاصته ممتعة على قدر كبير من الفانتزية والحلمية الشديدة، مناهض للأساليب القديمة والقوالب الجامدة، كاتب سيناريو فيلم البوسطجي عن قصة ليحي حقي بنفس الاسم
5- صنع الله ابراهيم :
السردية المطولة لدرجة الملل المحبب يعتبر ده كل اللي ممكن يتقال عن صنع الله، بارع في الاسقاطات والترميز والخروج منها زي الشعرة في العجينة، اتسجن برضه فترة مش بطالة
6- يوسف عز الدين عيسى :
الواجهة اللي قال عليها نجيب انها من أفضل الحجات اللي قراها في حياته، يعتبر سابق لأوانه، شمولي برضه زي نجيب، على قدر جيد من اللغة، الغير مرهقة، كلاسيكي للغاية في كتابته ” أولد سكول “
7- سعيد الكفراوي :
عالم القرية بكل شواهده اللي دهسه بكتاباته وفصصه بمنتهى التحضر رغم سوءه وقتها. العامية الحوارية كجمل حاضرة في كتاباته، متفرد بمجاله، متفرده بخصاله، متفرد بكتاباته
8- سيلمان فياض :
من أكتر الناس المطلعة والمهضوم حقها، مطلع ، مولع بدس السم بالعسل والقراءات الساخرة. مصحح لغوي بارع، لغته تقيلة جدا مش أي حد يقراله. بيلعب بالموروث بطريقة حالمة وناعمة مش فجة او ظاهرة، كتابات برضه على قدر من السخرية من ذاتها.
9- يحيي الطاهر عبدالله :
الجنوبي الآخر، الشاعري الأزود عن اللازم، الحافظ لقصصه، الشاعرية احيانا على حساب النص، القصص مبتورة وعلى قدر من الغرابة مش بطال، القصص برغم قصرها المفاجيء واحيانا رخامتها بتجبرك تقراها كذا مرة، ودا شيء في حد ذاته غريب
10 – علاء الديب :
المجنون الرسمي، في حد يكتب بسريالية أو عن العدمية أو العبثية في وقت المبيعات والربح، مطلع جدا، بيرمي اسماء في كتاباته تبين قد ايه هو ملم بالعالم رغم كتاباته المبتورة، كاتب سيناريو فيلم المومياء احد اهم افلام السينما المصرية، ان مكانش اهمها على الاطلاق
11- محمد البساطي :
أكتر قصص ضبابية قريتها بالعربي، ومع ذلك اللغة ساحرة لدرجة التتنيح، ورغم علمك بإن القصص مفتعلة ومش مفهومة إلا إنك متملكش غير قرايتها مرة واتنين وتلاتة. بيكتب بطريقة الفقرات والايهام بالتكوين المتتابع. مفيش قصة ليه نفس البناء التكويني، كل قصة ممكن تتدرس باكاديمية كطريقة أدبية مستقلة بذاتها.
تحت كل كاتب منهم لينك في جودريدز للي حابب يزود معلومات عنهم
عن الكاتب
اسلام عشرى
التعليقات

يجب عليك تسجيل الدخول لإضافة تعليق