الآن تقرأ
خمس أماكن للناس الرايقة بعيدة عن العواصم الأوروبية العايقة

كتير من الناس بتبعتلي تسألني على مدن مشهورة في أوروبا أنها رايحة تزورها وأيه النصايح اللي أحب أني أديهالهم في السفر خصوصا بعد تدوينة دليلك للسفر لأكبر عدد من الدول في أوروبا من غير ما تفلس. وعادة بتكون المدن اللي هما رايحنها رئيسية زي مثلا باريس، لندن،برلين وأمستردام. وفي الواقع، فأن في أماكن في أوروبا كتيرة جميلة جدا ومدن غير رئيسية بتعبر كتير عن ثقافة البلد الأوروبية الخاصة اللي تقدر تفهم منها طبيعة شعوبها وتاكل أكلهم وشربهم وتعرف الفرق مابينهم وما بين الثقافات المجاورة. ده غير طبعا مناطق فيها مناظر خلابة اتوهبت بيها القارة العجوز.

إخترتلكم النهاردة 5 مناطق رحتها داخل أوروبا، كل واحدة فيهم في بلد مختلفة أوريكم شوية من مناظرها التحفة، إزاي ممكن توصلها بالمواصلات من العاصمة بتاعة الدولة اللي هي فيها وشوية معلومات عنها و شوية صور مختلفة منها اللي صورتها لما زرتها.

krimmler wasserfälle – النمسا:

ودي تقع في جنوب النمسا بجانب الحدود مع إيطاليا وجبال الألب. طبعا ناس كتير من السياح بيروحوا عادة في النمسا مناطق جبال الألب زي مثلا Hallstatt لما بيكونوا عايزين يشوفوا طبيعة جميلة. إلا أنه   شلالات كريمل من أجمل المناطق في النمسا لأنك بتقدر تمشي وسط الجبل وحوالين الشلال نفسه كما أنها أعلى شلالات في أوروبا – حوالي 380 متر ارتفاع وهي الخامس على العالم.

من مميزات المنطقة دي كمان أنها منطقة طبيعية مفتوحة فممكن تمشي تلاقي حيوانات وطيور وتصورها وتاخد بعضك وتبقا في وسط الجبل وتحس نفسك كأنك منقطع عن العالم كله (اعتقد في مناطق مكانش فيها شبكة تليفون أساسا).

عشان توصل من فيينا ممكن تاخد قطار لمدينة Innsbruck وتقضي فيها يوم وبعدين تطلع على شلالات كريمل في رحلة تستغرق حوالي 3 ساعات وشويا. أو من فيينا على طول حوالي 6 ساعات. طبعا والطريق بياخد وقت لأنها في عمق الجبل ومش على خط قطار سريع بشكل مباشر. أنما تستاهل! 😉

ماتنسوش تاكلوا هناك الأكلة النمساوية : hirschragout وهي عبارة عن لحم غزال مطبوخ ومعاه خضار وعلى جنب مربى!

أما لو كنت بتسأل عن Hallstatt فهي مدينة في الشمال قليلا ومن أجمل البقاع على الأرض لدرجة أنها من المدن اللي الصينيين عملوا منها نسخة عندهم:

مش عارف أوصفلكم الصراحة الحالة لما كنت بصور الصورة دي.

وده موقع شبكة قطار النمسا :

http://www.oebb.at/en/index.jsp

وده موقع القرية:

http://www.wasserfaelle-krimml.at/html_engl/wasserfall_engl.html

ولو عايز تبات في بيوت ضيافة موجودة تقليدية ممكن تقعد فيها ليلة مثلا و ميزة البيوت دي أنها بتقدم أكل بيتي وبتبقى كأنك عايش مع عيلة.

 Hundige Strand Familiecamping – الدنمارك:

وده من أجمل الCamps اللي ممكن تعملها في أوروبا لعديد من الأسباب. أولا لأنه على بعد 10 دقايق من بحر الشمال اللي اتفاجئت بأن الماية فيه جميلة (هي صحيح ساقعة شوية) بس حلوة جدا ده غير أن المنطقة فيها مرسى لمراكب وبالتالي الخدمات اللي موجودة في الCamp من مطاعم وأماكن للتسوق وفي نفس الوقت الخدمات جوه المكان نفسه كانت على مستوى عالي. ممكن في المكان ده تأجر كباين لأشخاص وممكن تأجر عربية Camp كبيرة وممكن تأجر مكان بس لو انت معاك حاجتك. أماكن زي دي لو ناس كتير اتجمعت وراحتها بتدي فرصة الهدوء لراحة البال والتفكير في أفكار مختلفة ونشاطات مختلفة بعيدا عن ضوضاء المدينة.

كان فكرة مطرقعة أننا نروح مع أصدقائي نقضي ويك إنك هناك بالعربية ونزور مدينة كوبنهاجن بالمرة.

عشان توصل للمكان ده من كوبنهاجن محتاج تركب مواصلات على بعد حوالي 45 دقيقة من كوبنهاجن لو سألت في محطة القطار الرئيسية هتلاقي في قطار بيوصل المكان اللي فيه الCamp كل حوالي 15 دقيقة وشغال حتى برضه في الويك إند.

وده موقع شبكة المواصلات الدنماركية:

http://www.rejseplanen.dk/bin/query.exe/en

وده موقع الcamp نفسه للحجز:

http://www.camping-koebenhavn.dk/en

Brno – التشيك

كنت في يوم داخل عليا ويك إند وفتحت الخريطة مش عارف أروح فين فقررت أني أشوف المدن القريبة من المكان اللي عايش فيه ولقيت مدينة “برنو” في التشيك اللي حسيت اني اكتشفتها (هي اسمها غريب شويا بس جميلة والله :D) طبعا ناس كتير ماتعرفش في التشيك غير مدينة براج الضخمة. وناس كتير متعرفش برضه أن التشيك من أكتر الدول فيها حركة فنية واهتمام بمظاهر الجمال في أوروبا والفنون بشكل عام. مدينة برنو من المدن الصغيرة اللي تحسسك بنفس احساس اسكندرية القديمة من المعمار بتاعها وشوارها الضيقة وتلالها وقلعتها الكبيرة. ده غير أنها رخيصة بشكل غير منطقي (قهوة وازازة ماية معدنية ببلاش ودفعت 2 يورو ونص). وده لأنها مش مدينة سياحية جدا وبالتالي الأسعار فيها للمواطن العادي.

مدينة برنو حسيت انها قطعة متحافظ عليها من العصور الوسطى لأنها بالفعل كان جزء من الامبراطورية البوهيمية ثم أصبحت جزء من الإمبراطورية النمساوية – المجرية. ده زائد شعبها اللي كان لطيف جدا في التعامل معايا وأكلهم التشيكي الأصيل ومشروبي المفضل “كوفولا” وهو عبارة عن كولا بالعرق سوس. كما أني شفت فيها نماذج لفن الشوارع كتير من ضمنها عازفة الهارب الحلوة دي.

مدينة برنو ممكن توصلها من فيينا (عاصمة النمسا) في خلال ساعة ونص بالقطار. أو من مدينة براج عاصمة التشيك في خلال ساعتين ونص (في الواقع هي بتقع على طريق القطار اللي ما بين النمسا والتشيك)

وده موقع المدينة:

http://www.brno.me

وده موقع شبكة المواصلات التشيكية:

https://www.cd.cz/en

Capri – إيطاليا

كنا في رحلة لمدينة نابولي في إيطاليا اللي هي تحسها قطعة من العجمي ومحطة الرمل مضروبين مع بعض في الخلاط بناسها وشوارعها  وطريقة كلام الناس فيها وكل حاجة. وبعدين قررنا نزور الجزيرة الصغيرة دي قبالة سواحل نابولي بالمركب. ومن المعلومات اللطيفة اللي عرفتها عن الجزيرة دي أنها المكان اللي قضى فيه الملك فاروق والملكة ناريمان فيها شهر العسل (شغل ملوك بصحيح). كابري مشهورة بصناعتها اليدوية والمشغولات اللي مختومة بختم البلد ومشهورة كمان بأكلها الإيطالي النابوليتاني. كما أن بيوتها ومعمارها البحر متوسطي الجميل على الجبل داخل الجزيرة من أروع ما يمكن.

Pizza Capricciosa

وللوصول لكابري من نابولي عن طريق مركب :

http://www.capri.com/en/ferry-schedule

أو من روما:

http://www.capri.com/en/getting-here

وده موقع شبكة القطارات الإيطالي:

http://www.trenitalia.com/tcom-en

وده موقع الجزيرة:

http://www.capri.com/en/index

Haarlem – هولندا

هارلم من أجمل المدن الأوروبية اللي شفتها وهي مشهورة بالطابع الهولندي المعماري الأصيل ومنظر طواحين الهواء الشهير. كما أنها من أفضل الأماكن لرؤية حقول التوليب وشراء الجبن الهولندي اللي جي من المزارع مباشرة. بتمتاز هارلم كمان بسهولة التمشية فيها وركوب المراكب اللي بتمشي في أنهار هولندا الصغيرة. وفيها مطاعم سمك معمول على الطريقة الهولندية (صوص الهولنداز مثلا 😀 )

وللوصول لهارلم من امستردام ممكن بالمركب النهرية:

http://visithaarlem.org/gettingaround

أو بالقطر وده موقع شبكة القطارات الهولندي:

http://www.ns.nl/en/travellers/home

وموقع المدينة:

http://visithaarlem.org

حاولت أني اجمعلكم مجموعة من المدن لعشاق الروقان والابتعاد قليلا عن صخب المدن ودوشتها وأنكم تستمتعوا بزيارة مدن ومناطق في أوروبا غير تقليدية وتقدروا فيها تعيشوا جزء من ثقافة البلد اللي انتم بتزروها بالفعل.

 

ينشر بالتعاون مع مدونة حسين عادل فهمي

(Visited 654 times, 1 visits today)