الآن تقرأ
5 خطوات تجعلك تعيش في “السلام البرنسي”

يعيش العالم الآن فتره صعبة، تجعلنا عاجلا وليس آجلا على أعتاب حرب عالميه ثالثة..
كل اللى فات ده مش مهم، لكن الأهم كيف تضمن لنفسك في ظل هذه الأجواء الدموية أن تصل إلى مرحلة “السلام البرنسي”، لتصبح برنس عالمك وبرنس نفسك.

1- حلق في سماء العالم بالموسيقى الصوفية:

أول ماتحس إنك مخنوق ومتضايق ومش عاجبك حال الدنيا، وممكن تقوم تولع في اللى قدامك.. فرمل وحط سماعاتك في ودنك وافرد جناحاتك وطييير .. طير واسمع مزيكا تسرح فيها في الملكوت.

وأنا هبدأ من عندي واسمعك أول السكة وإنت انطلق

2- مالكش دعوة:

مرحله الـ”مالكش دعوة” دي مرحلة مهمة جدا، تأتي بعد تهدئة الموسيقى، وتتلخص في أنك أي حد يحاول يدخلك في أي موضوع قوله “مالناش دعوة”، ودي مش ندالة، بس لأن نص الجدعان اللي قالوا لينا دعوة استجموا في السجن دلوقت، والنص التانى هج من البلد.. فمالناش دعوة بحد.

3- تعلم اللغات:

حاول تتعلم لغات مش موجودة في حيز حياتك، يعنى اتعلم روسي أو إيطالي أو كوري.. إسبانى أو حتى هندي، المهم تتعلم لغة لبلد بعيدة يوم ماتسافر هناك وتقرر تعيش برنس ماتقابلش ناس كتير تعرفهم، واللغات عامة مفيدة عشان لما تحب تشتم محدش يفهمك.

4- اقرأ في الفلسفة والمسرح والأساطير:

القراءة دائما ما تجعلك تسافر بذهنك لبلاد وعوالم كثيرة، منها واقعية وأخرى من نسج الخيال..
اقرأ لنفسك مش عشان الناس تقول عليك مثقف
اقرأ في الأدب والفلسفة وعلم النفس، واتعرف وغوص أكتر في نفسيات الناس عشان تعرف الناس اللي بتتعامل معاهم، واقنع نفسك دايما إنك عايش في أسطوره كبيرة، وإنك احتمال مش ضعيف لما تموت تتحول كائن أو طير أو حيوان.

5- اكتب كل حاجة:

بعد ما تستمتع بمود الموسيقى الصوفية، وبعد ما تقرا كتير وتتعلم لغة جديدة مش متداولة كتير، وبعد ما تترفع عن إقناع الغير بوجهة نظرك، وفي نفس الوقت لا تنساق لوجهات نظر الآخرين، اكتب يومياتك وكل المواقف اللي بتمر بيها وكل قناعاتك ووجهات نظرك، وماترميش أي ورقه بتكتب فيها رأيك أو وجهه نظرك أو تعليقك على حاجة شفتها أو سمعتها أو تجربة عديت بيها.

في يوم من الايام كلامك ده هيبقى مهمـ وممكن حد بعدك يقراه يفهمه أو مايفهموش يعجبه أو مايعجبوش، مالناش دعوة، المهم إنت جيت الدنيا ومشيت وكتبت واتكلمت عنها.

عن الكاتب
هبة العفيفي
التعليقات

يجب عليك تسجيل الدخول لإضافة تعليق