الآن تقرأ
عايزة أصاحب مش عايزة أتجوز

إذا كنتِ تبحثين عن زوج وتخشين من أن يفوتك قطار الزواج فهذا المقال لن يفيدكِ كثيراً أما اذا كنتِ من عشاق الحياة والمتعة والبحث الدائم عن الشغف وترغبين فى أكثر من الاستقرار وتكوين أسرة فقط فالسطور التالية لكِ

فى إحدى المرات وأنا أتحدث مع إحدى صديقاتي عن مفهوم الحب والارتباط قالت لى,, صفاء, أنا عايزة أصاحب مش عايزة أتجوز !

نظرت إليها نظرة تعجب وتبسمت.. فترد وهى متمسكة برأيها  على فكرة أنا مش بهزر

وبعد مناقشة ليست طويلة فهمت أنها  لم تقصد المعنى الدارج للعبارة ولكن تقصد طريقة التعامل في العلاقة نفسها  بعد أن فهمت وجهة نظرها تأملت قليلاً  نعم هناك فرق كبير بين زواج الصالونات والزواج بعد صداقة حقيقية عميقة وممتعة

فمثلاً نجد أن (المتصاحبين) عنصر الملل قليل لما يكون موجود لأن كل واحد بيعبر على اللى حاسس بيه من غير أي تكلف أو واجب بيعمل ويقول اللي حاسس بيه وبس لأن العلاقة أصلا مبنية على التلقائية والصراحة فا هنلاقيهم مش مضطرين للتصنع  لأنهم ببساطة ما اتعودوش يعملوا غير اللي نفسهم يعملوه وبس.

متستغربش لو لقتيهم فرندز علي الفيس بوك بس ولا كأنهم يعرفوا بعض دا مؤشر قوي أن العلاقة بينهم أكبر من الفيس بوك بكتير ولو صادف ولقيت منشن لهم هتلاقيه إما على موضوع جد جداً كانوا بيتكلموا فيه أو على حاجة ماتوا من الضحك عليها

عمرك ما هتلاقي منشن على قلوب وحب وأحضان والحاجات دي لأن الرومانسية بينهم لها قدسية خاصة أكبر من بوست على الفيس بوك, في الغالب مبيفرقش معهم يظهروا بشكل معين قدام الناس على الفيس بوك أو الإنستجرام  ومين يفهم ايه المهم انهم مبسوطين وأكيد مش هتلاقى قصايد الحب الفظيعة  ( أنت أحن راجل فى الدنيا وأنتي أحسن ست فى العالم ) قدام الملاء كدا لأنهم ببساطة مش بتفرق معهم حاجة غير سعادتهم وبس بصرف النظر عن الناس .

على طول هتلاقيهم زى القط والفار ودي ليها متعة خاصة عندهم, بيتبسطوا سواء قعدوا فى كافيه جامد أو اتمشوا عشر محطات نفس الانبساط عادي.

وهما بيجهزوا شقتهم لجواز هتلاقيهم بيختاروا الضروريات اللي هيعيشوا بيها في شقتهم مرتاحين وجايز تلاقي أقصى حلم ليهم في الشقة شاشة (ال سى دي) وكنبة مريحة عشان يتفرجوا على الحاجات اللي بيحبوها سوا , مش هتلاقي سفرة كبيرة ونيش كله تحف وانتيكات والكلام دا

السفر عندهم من الأساسيات مش فى الإجازات والعطلات الرسمية وقت ماهيحبوا يسافروا هيعملوا كدا بالرغم من أي ظروف. كل واحد فيهم بيعمل حاجة بيحبها جداً وعنده أصحاب كتير ومستمتع بحياته واللي بينهم سعادة إضافية لحياة كل واحد فيهم

العلاقة اللي بالشكل دا كل حاجة بتاخد حقها أوى يعني لو النقاش في الموضوعات الجد بتكون قمة الجد والهزار والضحك برضو واخدين حقهم بجد !

كل واحد فيهم عنده أهداف وأحلام ومؤمن بحرية التاني واستقلاليته هتلاقي روحهم بتتفق على نفس الفيلم والأغنية وحاجات تانية كتير  .

بعد لما فكرت فى كل دا وحسيت قد ايه ممكن الواحد يفوته كتير لو معاش كدا قولت فى نفسى.. ( أنا كمان عايزة أصاحب مش عايزة أتجوز))

 

 

عن الكاتب
صفاء أحمد
2التعليقات

يجب عليك تسجيل الدخول لإضافة تعليق