الآن تقرأ
الوريث الأبله (اعترافات السيد س) – قصة قصيرة

منذ أن شرع في الولوج إلى زمرة السادة وصار حاكما للمملكة ..ومنذ أن كان جندي صغير تافه الشأن في جيش المملكة وأنا أراقبه..بمحاولاته البائسة للتظاهر بالفروسية..بجسده المكتظ الخالي من انتصاب المقاتلين الأشدّاء وجبهته النصف دائرية البليدة وسمرته الباهتة التي تذكرني بقبائل الهمج القاطنة شبه الجزيرة المجاورة..الأمس فقط استطعت أن أفك الشفرة المُعقدة لمتوالية قراءة (أفكار الأخدود الداخلي) ..هو إنجاز يستحق الفخر لجنسنا..لكن لا وقت للبهجة..أشعلت شمعة زيت لُبّ الخشخوش الأحمر وتبولت لمدة ستة ساعات سريعاً..وتهيأت للإطلاع على أفكار السيد س الذي كُلفت بملازمته قبل أن تترك بذرته خصية والده التاجر المعروف بدرب الشلايش…فلنضحك قليلاً قبل المراحل الهامّة..انا بانتظار تلك اللحظة منذ ستين عام..ها أنا ذا..

قراءة أولى

“..ميعرفوش اللي فيها هههههههيييهههييي..”

“أنا ممكن أعمل أيه في الحوار ده؟”..

“شعب مين اللي يجوع وذنب أيه اللي في رقبتي ..؟؟

قراءة ثانية

“هيبتك أهم من اي شيئ..الرعاع طول عمرهم رعاع..والسادة طول عمرهم سادة..ومينفعش المملكة دي تتحكم غير كدة..هما بيعشقوا الكرباج والكلبشات والشلاليت والاقلام والزعيق..بيعشقوا “الظابط” مهما أهانهم وبهدلهم..و هه؟ آه مازوخية ..اسمها مازوخية”

قراءة ثالثة

“هو أنا هعمل أيه ولا ايه..بس لازم شوية التنطيط والانجازات دول..حتى لو بَلَح..وهما عارفين من جواهم إنها بلح..بردو..هه؟ ..لا احنا مبنعملش لإسكات المعارضة..إحنا بنشتغل علشان احنا ناس بتوع شغل..ولازم نفضل في عين الرعية بتوع شغل..ومفيش غيرنا بيشتغل..أمال أيه..نقعد في بيوتنا يعني وناس غيرنا ياكلو خيرها؟..شعب ميين اللي غلابة يا (س)؟؟..دول كلاب صعرانة تخاف متختشيش..أقف انتباه ياله منك له !! هعهعهعهعهعههااع لا حلوة”

فرغت من القئ لتوي لمدة يوم كامل من فرض الضحك  والنفور..ذلك ال “س” حقاً لا يأبه ولا يهتم لملايين الجوعى في أرجاء مملكته…هو لا يرى سوى عرش مُذهب تركه له أباه العجوز المتقاعد..هو لا يعي ما يفعل..هو…يرى الأمور من زاويا شخص أبله بالفعل..تباً..لماذا قُدّر لي هذا المأفون؟..والأنكى..أنني الآن لا أستطيع التوقف..

قرءات عشوائية لا إرادية..

  • – —
  • هاتهم لي..
  • يتربوا..
  • مفيش بالراحة أنا بحارب..وبحارب عدو مبين
  • الحق أنا وأنا الحق..
  • مش وقته..
  • اللي أقوله يتنفذ بدون مناقشة..
  • طلع الكلاب من القفص وسيّبهم
  • اللي تبعنا نحميه..أو عالأقل ندعمه..
  • لا..كدة مش هناكل عيش..عندنا بلاوي لسه..
  • في ستين خرّارة ! دي عيال بنت وسخة متربتش..
  • مين اللي بيقول س فاشل؟ البت دي؟؟ رجعوها بلدها قبل ما ***** أمها !
  • بيكرهوني..
  • مش فاشل …
  • هعمل أيه ولا ايه ولا أيه؟
  • لا دول مهمين ومقدرش اقول لهم هاتو
  • لا دول بهايم عايمة في فلوس ومفيهمش دكر يعرف يشيل سلاح…حق الرجالة بقى !
  • لا دول تبعنا..
  • قولي يابا (م) أعمل أيه؟..
  • يلاّ ياكش تخرب..الدهب في الزكايب واللي عايز يكبش يكبش..المهم أعيش فارس
  • أمنت نفسك؟ لا طبعا..طب يلا أمّن يا (س)..
  • ماما وحشاني..
  • هو أنا وحش يارب؟
  • أنا عسل..
  • لا خلاص مفيش..
  • ولا الضالين دي بتاعتي؟؟ ولا بتاعتهم؟
  • أنا مفتري؟؟ إزاي بس .. دول مجرد شوية جرابيع مش فاهمين ..

الآن أقف حائراً وسط الصف الطويل الذي يمتد بطول الأرض الثالثة أنا ومليون وربعمائة ألف سُفلى ساذج مثلي أمام بوابة البرج الأقمر.. ننتظر عفواً او تبديلاً لمليون وربعمائة ألف أبله كُتب علينا أن نقرأ أدمغتهم البلهاء قهراً..مرحى..!

 

(Visited 123 times, 1 visits today)
عن الكاتب
جمال النشار
كاتب ومؤلف مصري ..حاصل علي بكالوريوس في السياحة ودبلومة الادب الأنجليزي صدرت له اعمال ورقية قصصية ما بين الرواية والقصة القصيرة وشارك بعدة مقالات حرة و إبداعية بعدد من الجرائد الأليكترونية , حاصل على جائزة القصة القصيرة من المجلس الأعلي للجامعات عام 2004\2005