الآن تقرأ
للبنات.. إزاي تخليه يعترف بحبه

أثبتت معظم الدراسات أن المرأة لديها موهبة قوية تجعلها قادرة على معرفة مشاعر الرجل تجاهها، علشان كده إذا كنتِ غير متأكدة بنسة 100% من مشاعر شخص ما تجاهك؛ عليكِ فورا بالثقة فيما تقوله نفسك وموهبتك الطبيعية.

ومع ذلك ممكن تعتمدي على مؤشرات معينة، سواء تمثلت في الكلام  اللي بيقوله الشخص ده أو حتى الأشياء التي لا يقولها صراحة؛ لأن طريقة كلام كل شخص وتصرفاته بتحدد طبيعة مشاعره تجاه من حوله.

ممكن يكون الشخص اللي بتتواصلي معاه بيحتل مساحة كبيرة من حياتك، مساحة أكبر من كونه مجرد صديق لكنها أيضا المساحة اللي مالهاش تعريف محدد بالنسبة للطرفين، ببساطة لأن الشخص ده بيظل متحفظ جدا في منح العلاقة دي التسمية المناسبة، وبيتجنب الحديث عن مشاعره بشكل صريح وواضح.

لكن الأمر بيكون مُحبِط جدا، لما بتشعري للحظة – وبحسب موهبتك – إن هذا الشخص يحمل مشاعر حقيقية تجاهك، لكنه عاجز عن التعبير عنها، ودي مشكلة صعب جدا التعامل معها.

لكن الاستمرار في مشاعر الإحباط دي مش هايحل المشكلة، لأنك لازم تعرفي إن الرجل كائن ماهر جدا في إخفاء مشاعره، وأحيانا ما بيقدرش يستجمع شجاعته للتعبير عنها خوفا من رفض الطرف الآخر له أو خوفا من أن يظهر بمظر الشخص السخيف الغبي.

علشان كده لو أدركتِ إنه بيحمل مشاعر حقيقة تجاهك، مهتم بيكِ، ومش قادر حتى يعبر بكلمة، لازم تحاولي بنفسك إنك تساعديه على التعبير والاعتراف.

موقع “نيو لاڤتايمز” بيقدملك 12 نصيحة ممكن تعتمدي عليهم لتشجيع الرجل على الاعتراف بحبه.. لكن تذكري إن النصائح الموجودة في السطور القادمة لا تعني أبدا إنك ” تجبري” شخص على الاعتراف، لأن الهدف هو منح الطرف الآخر المزيد من الثقة ودفعه للتعبير الحقيقي عما يشعر به.

1 خليه يثق فيكِ:

أحيانا بيكون فعلا بيحبك لكنه متردد في التعبير عن الحب ده بسبب أزمة ثقة، ببساطة هو مش واثق إنك هتتقبلي الموضوع وتتعاملي مع الموقف بشكل جيد، ممكن مثلا يتخيل إنك هاتسخري منه أو هاتصديه.

علشان كده مهم جدا بناء حالة من الثقة المتبادلة واللي بتحصل بمرور الوقت.

امنحيه وقت كافي علشان يثق فيكِ ويعترف بمشاعره.

2 اتكلمي واسمعي:

من المهم جدا تكلميه عن نفسك أو تتكلمي عنه كمان، لكن دايما خليكي مستعدة تسمعي منه؛ لأن معظمنا ممكن يصاب بخيبة أمل لو الطرف الآخر ماهتمش بكلامه.

علشان كده اتكلمي عن نفسك، وكمان امنحيه مساحة يتكلم فيها عن نفسه واجعلي من نفسك الشخص المُنصِت لكلامه.

3 شجعيه على بناء حوار:

إذا كنتو بتتكلموا من خلال نوافذ التواصل الاجتماعي، لازم تراعي إنك تسمحي له بفتح حوار؛ يعني مثلا ماينفعش يكون الحوار بالشكل ده:

هو: أهلا- ازيك؟

أنتِ: أنا كويسة.

هو: يومك كان عامل إزاي؟

أنتِ: لا مفيش جديد.

لو الحوار بالشكل ده تأكدي إنك في مشكلة كبيرة وتأكدي بردو إنه عمره ما هايعترف بمشاعره أبدا، ببساطة لأنك بطريقتك دي بتثبتي إنك شخص سخيف مش متحمس لأي شيء.

أبسط قواعد الحوار هو إنك تكوني مهتمة بالسؤال وتردي بما يدل على الاهتمام ده.

علشان كده ضروري جدا تسأليه عن نفسه، وخليه يحكي، ويقود الحوار كمان.

4 شجعيه على التعبير عن مشاعره:

بعد ما تخلصوا كلام عن الأحداث اللي بتحصل حواليكو، ابدأي في الكلام عمّا يشعر به كل طرف، ادفعيه للحكي عن مشاعره الحقيقية وده هايكون مدخل يشجعه على تطوير كلامه.

5 ماتبقيش شخصية مُبالَغ فيها:

لو كنتِ فعلا متأكدة إنه بيحمل مشاعر تجاهك، ياريت تحاولي تكوني شخص خفيف في حياته، بلاش تحاصريه طول الوقت لأن الحصار فعل يُصيب الرجل بالضيق.

امنحيه المساحة والوقت الخاص به، ودي فرصة بردو علشان يشتاقلك.

6 حاولي دايما تكوني نفسك وبس:

التظاهر بإنك شخص تاني أمر مش هايحقق أي شيء، لأن الإنسان اللي هايرتبط بيكِ لازم يكون عارفك على طبيعتك، علشان كده ثقي في نفسك وماتحاوليش تمثلي علشان تكوني شخص تاني لمجرد إرضاء أي حد.

7 خليه يغير عليكي من وقت للتاني:

الموضوع ده ممكن يشجعه جدا.. حاولي تظهري إنك مهتمة بشخص تاني وفي حضوره. لكن في المقابل ماتخليش اهتمامك بالشخص التاني ده يكون بشكل مبالغ بل بحدود معقولة.

8 خليه يشتاقلك:

حاولي تكوني عزيزة، مش لازم كل ما يحتاج لوجودك يلاقيكي، بالعكس خليه يشتاقلك ولو لبعض الوقت لأن الغياب هايدفعه للبحث عنك وربما يكون بداية للاعتراف بمشاعره.

9 لا تبوحي بكل أسرارك:

من المفيد إنك تكوني غامضة لأن دي ميزة هاتجعله شغوف جدا للتعرف عليكِ أكتر.

خليه يبحث عنك ويحاول يعرف أمور جديدة عن شخصيتك، لأنك وقت ما هاتبوحي بكل شيء يخصك هايفقد حماسه للأمر وهايتوقف عن الاهتمام.

10 قدّريه:

مفيش أقوى من إنك تمدحي الرجل، ده شيء بيرفع مستوى الأنا عنده وبيجعله يشعر بالفخر، علشان كده لازم تقدري أفعاله وتظهري تقديرك ده بقدر الإمكان.

علشان كده لو ساعدك في حاجة أو أظهر اهتمامه بمشاكلك، لازم تنقلي له إنك مدركة ومقدرة مجهوده وده فعل مش بس هايدعم ثقته بنفسه، ده كمان هايجعله يشعر إنه قام بالفعل المناسب للشخص المناسب.

11 تعرفي على آرائه عن معنى الحب والالتزام:

لازم تتعرفي على أفكاره عن العلاقات ومعنى الالتزام، دي أمور ممكن تسهّل الحوار بينكم وتساعد في تشكيل أفكار كل طرف عن التاني وممكن كمان تكون وسيلة للاعتراف بحبه.

12 اسأليه بشكل مباشر:

لو ماقدرش أبدا يعترف بشكل صريح، ممكن وقتها بس تحاولي تسأليه عن مشاعره، صحيح هايبدو إنك صاحبة المبادرة لكن أحيانا لازم ده يحصل.

كلنا ممكن نشعر بنوع من الانسجام مع شخص، ووقتها لازم نحدد نوع العلاقة دي بدفعه للتعبير عما يحمله من مشاعر، ولا نقصد هنا معنى الإجبار بل فقط مجرد تشجيعه للتعبير عن نفسه، وهو خطوات لا تنتقص منك لأنها بالتأكيد هاتخفف من قلقك وتوترك وهاتجعل الأمور أكثر وضوحا.

الرابط الأصلي:

 

 

 

عن الكاتب
مريم كمال
التعليقات

يجب عليك تسجيل الدخول لإضافة تعليق